१०७
ब्राह्मण जोशी शूद्रानें घर बांधले म्हणजे घरभरणीच्या वेळी आपण ताजा स्वयंपाक खाऊन उरलेला शिळा पाक घरधण्यास ठेवून कसा जातो याविषयी
पाया उन्हामध्ये बिगारी खांदिती |
टोपली वाहाती मलम्याची ॥ १ ॥
गगनी पाहाडी गवंडी चढती ॥
विटा त्या मांडिती गाऱ्यामध्ये ॥ २ ॥
माकडाचेपरी सुतार वेंगती ॥
लाकडे जोडिती काळाशीने ॥ ३ ॥
पोटासाठी सर्व यातना भोगिती ॥
नाही पोटी भीती कामकऱ्या ॥ ४ ॥
घामाचे पाझर थेंब टबकती ॥
सर्वदा झटती दया फुटे ॥ ५ ॥
श्रम पाहूनिया धनी खुष होती ||
वचन बा देती जेवणाचें ॥ ६ ॥
अशा जेवणास वास्तू नांव देती ॥
खुशामती येती अखेरीस ॥ ७ ॥
देऊनी मुहूर्त दिवस नेमिती ॥
नादी लावताती घरधनी ॥ ८ ॥
ब्राह्मणभोजन होम करविती ॥
ढाला उभारीती निशाणांच्या ॥ ९ ॥
थाप देऊनिया भोजन सारिती ॥
दक्षिणा ती घेती यथासांग ॥ १० ॥
संध्याकाळ झाला आशीर्वाद देती ॥
बुडवूनी जाती अज्ञान्याला ॥ ११ ॥
धनी कामगार तोंडाकडे पहाती ॥
शिळा पाक खाती सावकाश ॥ १२ ॥
भोळ्या भाविकाला ठक फसविती ॥
अधोगती जाती जोती म्हणे ॥ १३ ॥
