या पानाचे मुद्रितशोधन झालेले आहे
जात मानवाची
मानती उपकार सारे पूर्णतेच्या श्रेयसाचे
मेले शिपाई, सरदार तुम्ही त्या यशाच्या वारसाचे
भव्य प्रासादास तुमच्या रक्त अश्रुंचा गिलावा
सडक सम्राटास तेथे काय थंडावा मिळावा ?
मतलबी उपकार तुमचे चालती काठावरी
भोवऱ्याला नाव जाता आन्हिके घाटावरी
पोसतो विद्यगर्भ तुमचा पाहता दुज्याची लेकरे
पोटची का वाटताती सद्गुणी ती पाखरे ?
कोण तुम्ही सांगणारे जातीचे मार्तंड हो ?
संस्कृतीला मानता का मतलबी उतरंड हो ?
सोयीचे ते सत्य, त्याचा कोरडा डंका फुका
लाळघोटचा तुमच्या जीण्याची जात धिक्काराल का ?
जात मोठी लावुनिया करणी खोटी चालते
वूट चाटुनी कुणाचे ? चरणी पडता पालथे !
जातीचा मिरवुनी दिमाख जात का डागाळता ?
मानवाची जात असता व्यर्थ प्राणी वाटता !
उषःकाल । १६