या पानाचे मुद्रितशोधन झालेले आहे
स्वप्नसती
फुला-फुलांचा विणला प्रियकर
मीपण झाले फुला-फुलांचे
विणून झाले कितीक शेले
स्वप्न फुलांचे मऊ गालीचे
स्वप्नफुलांच्या स्वर्गामध्ये
खेळ खेळलो फुलाफुलांचे
भावजगी त्या श्रवणी आले
किलबिलणे ते फुला-मुलांचे
आणि अचानक तुटे मालिका
स्वप्न उरीचे फुला-फुलांचे
जाणीव होता वास्तविकाची
गहन प्रश्न ते वात्सल्याचे
स्वप्नसती मी, सौंधावरती
दर्शन होते स्वप्नसख्याचे
स्मित तयाचे सांगून जाते
हे संजिवन जीव स्वप्नाचे
उष:काल । ७