पान:इस्लाम आणि संस्कुति.pdf/107

९८

इस्लाम आणि संस्कृति

 "जे लोक पवित्र स्त्रियांची बदनामी करतात त्यांचा या जगांत धिक्कार होतो आणि त्यांना या लोकीं व परलोकी विलक्षण यातना भोगाव्या लागतात."

- पवित्र कुराण २४:२३.

 स्त्रियांची बदनामी करणारा या जगांत धिक्कार तर पावतोच पण परलोकांतही त्याला या पापाबद्दल जबाबदार धरले जाते; यावरून त्याचे हे पाप किंवा अधम कृत्य किती अक्षम्य असले पाहिजे याची आपणांस कल्पना येते. पवित्र कुराणच्या 'अल हमझा' या अध्यायामध्ये निंदाखोर व बदनाम करणाऱ्यांचा खरपूस समाचार घेण्यात आला आहे.
 इस्लामच्या उदार शिकवणीमुळे जनतेचा दृष्टिकोण अजिबात बदलून गेला; तिच्या स्त्रीविषयक विचारप्रणालीत आमूलाग्र फरक झाला. जेथे मुलीला दफन करण्याची प्रथा होती तेथे मुलीच्या जन्माचा सोहळा मोठ्या थाटाने करण्यांत येऊ लागला. मुस्लिम कुटुंबात मुलीच्या जन्माचे स्वागत कपाळावरील आठ्या व सुस्कारे यांऐवजी आनंदोत्सवाने करण्यांत येऊ लागले. मुलांइतकेंच किंबहुना मुलापेक्षा जास्त लाड व कौतुक करून घेण्याचे भाग्य मुस्लिम कन्यकांना लाभू लागले.

 "ज्याला कन्या आहे आणि जो तिला जिवंत दफन करीत नाही किंवा तिच्यावर रागावत नाही किंवा इतर मुलांशी वागतांना तिच्याशी पक्षपात करीत नाही त्याला परमेश्वर स्वर्ग देतो,"

-हजरत मुहम्मद पैगंबर

 आपल्या मुलींना ममतेने वागविणे हे स्वर्गप्राप्तीचे साधन आहे