संसार - बरा संसार संसार जसा तावा...

बरा संसार संसार
जसा तावा चुल्ह्यावर
आंधी हाताले चटके
तव्हां मियते भाकर

करा संसार संसार
खोटा कधीं म्हनूं नहीं
राऊळाच्या कयसाले
लोटा कधीं म्हनूं नहीं

अरे, संसार संसार
नहीं रडन कुढनं
येड्या, गयांतला हार
म्हनूं नको रे लोढनं

अरे, संसार संसार
खीरा येलावरचा तोड
एक तोंड मधी कडु
बाकी अवघा लागे गोड

अरे, संसार संसार
म्हनूं नको रे भीलावा
त्याले गोड भीमफूल
मधी गोंडब्याचा ठेवा

देखा संसार संसार
शेंग वरतून कांटे
अरे, वरतून कांटे
मधीं चिक्ने सागरगोटे

ऐका, संसार संसार
दोन्ही जीवाचा ईचार
देतो दुःखाले होकार
अन् सुखाले नकार

देखा संसार संसार
दोन्ही जीवाचा सुधार
कधीं नगद उधार
सुखादुखाचा बेपार

अरे, संसार संसार
असा मोठा जादूगार
माझ्या जीवाचा मंतर
त्याच्यावरती मदार

असा संसार संसार
आधी देवाचा ईसार
माझ्या दैवाचा जोजार
मंग जीवाचा आधार !

हे साहित्य भारतात तयार झालेले असून ते आता प्रताधिकार मुक्त झाले आहे. भारतीय प्रताधिकार कायदा १९५७ नुसार भारतीय साहित्यिकाच्या मृत्युनंतर ६० वर्षांनी त्याचे साहित्य प्रताधिकारमुक्त होते. त्यानुसार १ जानेवारी १९५६ पूर्वीचे अशा लेखकांचे सर्व साहित्य प्रताधिकारमुक्त होते.