निवेदन
'इस्लामी संस्कृति' या साने गुरुजींनी लिहिलेल्या ग्रंथाचा हा पहिला खंड. या खंडांत मुहंमद पैगंबरांचं जीवनच प्रामुख्याने आलेले आहे.
साधना परिवारांतील एक ज्येष्ठ कार्यकर्ते श्री. मुइनुद्दीन हारिस यांच्या साह्यामुळे हा पहिला खंड आज प्रकाशांत येऊ शकला. यापुढील खंडांच्या प्रकाशनांतहि त्यांचं असेंच साह्य मिळेल. परंतु या संकल्पित ग्रंथाचा कांहीं भाग पुस्तक रूपांत लिहून झालेला आहे, तसाच कांहीं भाग टीपा टिपणांच्या रूपानें एकत्र केलेला आहे. महाराष्ट्रांतील तरुण अभ्यासकांना हे एक आव्हानच आहे.
या ग्रंथप्रकाशनासाठी दोन हजार रुपयांचे अनुदान देऊन महाराष्ट्र राज्य साहित्य संस्कृति-मंडळाने जे साह्य केलें तें उल्लेखनीय आहे.
पू. विनोबाजी व उपराष्ट्रपति डॉ. झाकिर हुसेन साहेब यांनी साने गुरुजींच्या या पुस्तकाबद्दल आपुलकीनं प्रास्ताविक चार शब्द लिहिले. त्याबद्दल त्यांच्या ऋणांत राहणेंच साधना प्रकाशनाला श्रेयस्कर वाटतें. या थोरांचे आशीर्वाद साधना संस्थेला असेच सतत मिळावेत व मिळवतां यावेत.
'इस्लामी संस्कृति' या ग्रंथाचे पुढील खंड प्रकाशित करता आले तर साधनेला धन्य वाटेल.
भारताला रवींद्रनाथ 'महामानवेर सागर' असे संबोधीत असत. विविधतेंतील ऐक्य अनुभवण्याची कुवत जनतेत असली तर विविधता वैभवाला कारणीभूत ठरते, नाहीं तर वैराग्नीत ती समाजाला लोटून देते. विविधतेंतून वैभव निर्माण करण्यासाठी भावजीवनाची जी बैठक तयार करावी लागते ती तयार करण्याचे एक साधन या दृष्टीनेच आपल्या अखेरच्या दिवसांत साने गुरुजींनीं आन्तर भारतीचा ध्यास घेतला होता. इस्लामी संस्कृतीच्या प्रकाशनाचा हा उपक्रम त्या दृष्टीनें उपकारक ठरेल अशी आशा आहे.
साने गुरुजींचें अप्रकाशित व अनुपलब्ध असें सर्व साहित्य उपलब्ध व्हावें असा साधना प्रकाशनाचा संकल्प आहे. सर्वांच्या सहकार्यानेच तो सिद्धीस जाऊं शकेल. तसें सहकार्य सर्वांनीं द्यावें, ही प्रार्थना.
-प्रकाशक
६ ।
