या पानाचे मुद्रितशोधन झालेले आहे
संकेतनामक सर्ग पहिला.
दिंड्या.
आर्यभूमीच्या उत्तर प्रदेशीं
क्षत्रियांच्या कुळिं दिव्य सूर्यवंशीं
चंद्रकेतू जन्मला राजपुत्र,
तोचि कवनीं या धरिल करीं सूत्र. १
रूप सुंदर, सुकुमार तो कुमार,
शिरीं केशांचा कुरळ दाट भार,
नेत्र चंचळ बहु रम्य तेजदार,
स्वयें ज्ञानी गुणि मनाचा उदार.२
पिता त्याचा अति चतुर सद्विचारी;
माय साध्वी सकळिकां सौख्यकारी;
बाळ असतां तो, मातृकाळ झाला;
अर्भकाचा प्रतिपाळ नृपें केला. ३
राजतनये माते न देखियेलें,
मातृवात्सल्या नाहिं जाणियेलें ;
तयें बाळपणीं भोगिलें वियोगा,
माय अंतरतां मुके बालभोगां. ४
पिता होता नृप स्वजनहितीं दक्ष,
प्रजापालनिं जो पुरवि पूर्ण लक्ष,
थोर न्यायें संतोषवी जनाला,
नाम सत्यध्वज शोभलें तयाला. ५
