हे पान प्रमाणित केलेले आहे.
संवाद
"हेमंत आणि माधवीबद्दल ऐकलंस का?"
जेवायला बसता बसता तिनं विचारलं.
ही वेळ तिची आवडती. दिवसभर दोघांनी
दोन ठिकाणी घालवल्यावर संध्याकाळी एकत्र
बसून सावकाश जेवण जेवत दिवसात काय
घडलं, कोण काय विशेष म्हणालं,कुठली
सनसनाटी बातमी ऐकायला मिळाली ह्याचा
उहापोह व्हायचा. तसा फार गंभीरपणे नाही.
कारण बाहेरच्या जगातल्या घटना थोड्याफार
अलिप्तपणे शेरे मारण्यासाठी असतात,मनावर
घेण्यासाठी नव्हे, अशी त्यांची भूमिका होती.
विषय काहीही असो- घाटातल्या वळणावरनं
दरीत कोसळलेली एस.टी., कुणा मित्रानं
केलेली विजोड बायको किंवा आसाममधली
स्फोटक परिस्थिती - त्याचा परामर्श
घेण्याच्या पद्धतीतून त्या दोघांच्यातला सुसंवाद
फक्त स्पष्ट व्हायचा
"ऐकलं ना,' तो म्हणाला. "हेमा भेटला
होता."
"इथं आला होता?"
"मुद्दाम मला भेटायलाच आला होतासं
दिसलं."
